باسم اللى سلب ونهب
باسم اللى خطف وقتل
وهبّش فى لحم الصبايـا
بنسأل سؤال هو فين الأمان
هى فين الحكومة؟؟
*****
باسم السنج والسيوف والمطاوى
باسم اللصوص والبلطجية
وكل مجرم "مسجل خطر" أو "سوابق"
وقاطع طريق، مقفّل شوارع، مضلـّم حوارى
سؤالى وسؤالك هى فين الحكومة ؟
*****
مدام خلاص مفيش الحكومة
يبقى دراعنا هو الأمان
نعرّى .. نشفّى .. نعوّر .. نفوّر
نبهدل .. نفركش .. نقفّل .. نزوّر
ولو أى مجرم تمادى وتهوّر
نفصص عظامه، يروّح مكوّر
ولو عينه بجحة ومفيش حد عاجبه
بقرن الغزال نطيّر حواجبه
ولو مات فى إيدنا، ما نحملشى ذنبه
مدام الأمن غايب ومش راضى يرجع
نعاهدك ما نضعف
ولا نسيب أى صايع يروّح سليم
وخلى الحكومة تطنش تكبر تخون الأمانة
*****
ونفس السؤال هنفضل نردد
هى فين الحكومة؟
بغيابها بلدنا هتبقى مصارعة بخناجر وشومة
وهيفضل سؤالى لإمتى الغياب؟
لإمتى الغياب؟ ... لإمتى الغياب؟
ليست هناك تعليقات:
إرسال تعليق